————- శ్రీనివాస స్వీయ రచన ————-

నిజం నిప్పురా, నలుగురికీ చెప్పరా, లేకుంటే ముప్పురా

నిజం అప్పురా, తీర్చేస్తే గొప్పరా, వడ్డీయే తప్పురా

చెవిలో సీసం పోసినట్టు కంటిలో కారం చల్లినట్టు భరించలేమసలు సత్య గరళాన్ని గుండెలో దాచుకుంటే

నిజం తెలిసిన వాడి నవ్వు ప్రశ్నార్థకమో లేక ఆశ్చర్యార్థకమో తెలియదు!

కానీ ఎదుటి వాడికి తెలిసిపోతుంది నువ్వు ఏదో బరువు మోస్తున్నావని

గోడలకి చెవులే కాదు టివీ9 కళ్ళూ ఉంటాయ్

చీకటి బాగోతాల్నీ, బల్ల కింద చేతుల్నీ వెలుగులోకి తెస్తుంటాయ్

చివరికి నిజానికీ విసుగొస్తుంది - ప్రపంచం ముందు తేనే ముద్దాయిలా నిలబడుతుంది

పట్టు పరుపుల మీద దొర్లిన పరువంతా పాపం కోర్టు బోనులో నీరసించి చతికిలపడి పోతుంది

శ్వేతసౌధంలా అశ్లీల చిత్రమవుతుంది.

————- శ్రీనివాస స్వీయ రచన ————-

ఓ ప్రియా…
వెన్నెల వాకిట నిలచిన నన్ను చీకటి మాటుకు చేర్చావు
నందనవనమున వేచిన నన్ను శిశిరపుజ్వాలై కమ్మావు
నీ తనువువిరికి హృదయతావి లేనప్పుడు నువ్వు అప్సరసవు కాదు
నీ కంటిచూపులో కరుణకాంతి లేనప్పుడు నువ్వు దేవతవూ కాదు
మరి నువ్వెవరివి ; నువ్వెవరివి…
నా జీవనరాగంలో దేవుడు పలికించిన అపశృతివి నీవు
నా ప్రణయయాగంలో ఎదను బలిగా కోరిన క్షుద్రిణివి నీవు
నా యవ్వనరాజ్యంలో నిశ్శబ్దమేలే మరుభూమివి నీవు
నా ఆశలసంద్రంలో కల్లోలిత సుడిగుండానివి నీవు
నా ఆశయమార్గంలో నీడనివ్వని టేకు చెట్టువు నీవు
నా ఊహలఊయలలో నిదురనివ్వని జోలపాటవు నీవు.

నేను 3 సంవత్సరాల క్రితం సరదాగా డిజైన్ చేసిన వాల్ పేపర్స్ (800 x 600). అప్పుడు కంప్యూటర్స్ మీద అంత పరిజ్ఞానం లేకపోయినా తెలుగు మీద మమకారంతో వీటిని తయారు చేసాను. ఓ లుక్కేసుకోండి.

————- శ్రీనివాస స్వీయ రచన ————-

కన్నీటిచుక్క కన్నీటిచుక్క ఎక్కడ ఉంటావమ్మా నువ్వెక్కడ ఉంటావమ్మా…
కంటిపాపల చాటునా… గుండెలోయల మాటునా…
ఎక్కడ ఉంటావమ్మా… నువ్వెక్కడ ఉంటావమ్మా…
నువు తాకని కనుపాప ఉలి తగలని శిల కాదా…
నీ వెచ్చని కౌగిలితో ఓదార్పే జత కాదా…
ఎక్కడ ఉంటావమ్మా… నువ్వెక్కడ ఉంటావమ్మా…
ఈ మనసు మురిసే వేళలో ఆనంద బాష్పానివై…
ఇదే మనసు పొగిలే వేళలో వడగళ్ల వర్షానివై…
తడుపుతావే నిలువెల్లా; అణువు అణువు తడిసేలా…
ఎక్కడ ఉంటావమ్మా… నువ్వెక్కడ ఉంటావమ్మా…