బ్రాండ్ అంబాసిడర్లు
రాసినవారు శ్రీనివాస on Monday, 31 of March , 2008 at 10:55 am
దీని ముందు టపాలోని నేను రాసిన విషయం ఒకటి; అక్కడ జరిగిన చర్చ మరోకటి. నేను కేవలం నాకు నచ్చిన హకూనా మటాటా పదం గురించి ఇంకా కొన్ని వాక్యాల గురించి రాస్తే ఆ ప్రస్తావన కాస్తా పక్కదోవ పట్టి ఆ రచయిత మీదకి మళ్ళింది. అక్కడే అభిప్రాయం రాద్దామనుకుని విరమించి ఇక్కడ రాస్తున్నాను.
మనం సినిమాలో ప్రతీ అంశానికీ బ్రాండ్ అంబాసిడర్స్ని ఊహించుకుంటున్నాం. మిగిలిన విభాగాల గురించి ఏమోగానీ పాటల రచయితల విషయంలో ఇలాంటి పాట ఈయనే రాయాలి; అలాంటి పాట ఆయనే రాయాలి అని రచయిత సృజనాత్మకతని ఒక అంశానికే పరిమితం చేస్తున్నాం. మిగిలిన వాళ్ళ సంగతి ఏమో గానీ ఇది మంచి పద్దతి కాదని నా అభిప్రాయం. “నువ్వొస్తావని” సినిమాలో “కలలోనైన కలగనలేదే…” పాటను వేరొకరు రాసుంటే ఇంకా బాగుంటుందో లేదో అన్న సంగతి పక్కన పెడితే; చంద్రబోస్ ఆ పాటకు న్యాయం చేకూర్చారనే అనిపిస్తుంది కదా! “ఎక్కడో పుట్టి, ఎక్కడో పెరిగి…“, “ఎదిగేకొద్దీ ఒదగమని…” సంగతీ అంతే కదా. వీటిని ఏ సిరివెన్నెలకో వేటూరికో ఇస్తే ఎలా ఉంటుంది అని అనుకోకూడదు. అలాగే ఏదన్నా యూత్ సాంగ్ని చంద్రబోస్ తప్ప వేరెవరైనా రాస్తే అది వాళ్ళ తప్పిదంలా భావిస్తారు. భువనచంద్ర ద్వందార్థం స్ఫురించే పాటలు ఎన్ని రాసినా, వినగలిగే కొన్ని ట్యూన్లకు బాగానే రాసారు. ఆయన రాసే అనువాదపాటల్లో కూడా మాతృకలోని అర్థం మనకు నప్పకపోతే కొన్ని లైన్లు తెలుగులో మార్చి రాసినట్టు గుర్తు. వెన్నెలకంటి “తపస్సు”లో పాటలు బానే ఉంటాయి కదా!. ఈ మధ్యన వెలుగులీనిన వనమాలి “ఇక సెకనుకెన్ని నిమిషాలో…” అని అంటే ఆ ట్యూనుకి ఎంత బాగా ఒదిగిపోయిందది. ఇంతకు ముందు చాలా మంది “యుగమొక క్షణములా… క్షణమొక యుగములా…” అని అర్థం వచ్చేలా రాసినా, ఇప్పుడు వనమాలి రాసింది ఎంత ఫ్రెష్గా ఉంది అని అనిపించింది!
సుద్దాల అశోక్తేజ గురించి చెప్పుకునే ముందు విప్లవ సాహిత్యం గురించి చెప్పుకోవాలి. ఈ విప్లవ గీతాలు, సినిమా పాటలకు కొంచెం విభిన్నం. వీటిని కొందరు అనుభవైకవెద్యమైన వాళ్ళో, ఆ వాతావరణాంలో పెరిగిన వాళ్ళూ ఆ మాండలికం ఎరిగిన వాళ్ళో తప్ప మిగిలిన వాళ్ళు రాసినా మట్టి వాసనలోని కమ్మదనం, చెమట బొట్టులోని ఉప్పదనం కనిపించవు. అశోక్తేజ అటు ఆ పాటలు రాస్తూ మిగిలిన రకాల పాటలు కూడా బాగానే రాస్తున్నారు. ఇక భక్తి పాటల విషయానికొస్తే ఇవి రాసేవాళ్ళకు పురాణాలతో, సంస్కృత భాషతో కాస్త పరిచయం ఉండాలి. ముఖ్యంగా బ్రాహ్మణ కవులు (కవులకి కులం అంటగడుతున్నానని అనుకోకండి; ఇక్కడ పురాణాలతో బాగా పరిచయం ఉన్నవాళ్ళుగా అర్థం చేసుకోండి) వీటికి సరిపోతారు. వేటూరి, సిరివెన్నెలని పక్కన పెడితే, జొన్నవిత్తులని ఇక్కడ మనం గుర్తు చేసుకోవాలి. అందుకే పాట రాయడంలో కవికి ఉన్న సృజనాత్మకత విషయంలో విప్లవ గీతాలు, భక్తి గీతాలను మినహాయించాలి. ఇక భాస్కరభట్ల, కందికొండ, రామజోగయ్య శాస్రి, అనంత శ్రీరాం, పెద్దాడ మూర్తి తదితరుల గురించి నాకు అంత తెలియదు.
నేను సినిమా పాటకు దాసోహం అయ్యింది వేటూరి చలవ వలనే గానీ, సిరివెన్నెల సినిమాతో మాత్రం సినిమా పాటలలోనూ మనకు అర్థం అయ్యే సాహిత్యం ఉందనే అభిప్రాయం బలపడింది. ఆ తర్వాత వచ్చిన చంద్రబోస్ లాంటి వారి పాటలూ ఏమీ తీసిపోవు. ఉగాది పచ్చడిలో వివిధ రుచులున్నాట్లు సినీపాటలలో కూడా వివిధ నేపథ్యాలకు తగ్గట్టు పాటలు కావాల్సొస్తాయి. అది యుగళమో మెలోడీనో కావొచ్చు; మాస్, మషాలా కావొచ్చు; విషాదమో విప్లవమో కావచ్చు. మిగిలిన వాళ్ళకి ఎలా ఉంటుందో గానీ నేను మాత్రం ఎవ్వరు రాసినా ఎవ్వరు పాడినా ఏ భేషజాలూ లేకుండా ప్రతీ పదాన్ని ఆస్వాదిస్తాను. ప్రతీ పాటా ఏ శంకరాభరణంలానో ఏ సిరివెన్నెలలానో ఉండాలని ఆశ పడను. ప్రతీదీ ఏ వేటూరో, సిరివెన్నెలో రాయలేదని భాదపడను. ఇవన్నీ నా వ్యక్తిగత అభిప్రాయాలు మాత్రమే. నాకు గుర్తుకొచ్చిన వ్యక్తులను/పాటలను మాత్రమే ఇక్కడ ఉదహరించాను, ఏమన్నా వదిలేసి ఉంటే అన్యదా భావించకండి. మరీ మాస్గా చెప్పాలంటే నాకు బ్రాండ్తో పనిలేదు; కిక్కెక్కాలంతే 
- ఈ టపాను వీటికి జతచేయండి
- Del.icio.us -
- Meneame -
- Digg
కొత్తపాళీ యొక్క అభిప్రాయము
Made Monday, 31 of March , 2008 at 6:15 pm
పాటల్తో కిక్కు సంగతేమోగానీ నీ టపా మస్తు కిక్కిచ్చింది మిత్ర కేసరీ!
ప్రవీణ్ గార్లపాటి యొక్క అభిప్రాయము
Made Tuesday, 1 of April , 2008 at 3:39 am
చక్కని టపా…
Srinivasa Raju Indukuri యొక్క అభిప్రాయము
Made Tuesday, 1 of April , 2008 at 6:49 pm
అందరికీ నచ్చేవిధంగా రాయాలంటే.. ఎలా??
అది ఎవరివల్లా సాధ్యంకాని పని… ఎవరి అభిప్రాయాలు వారివి… ఎవరి అభిరుచులు వారివి…
అలా అని… వేటూరి, సీతారామశాస్త్త్రి లే వ్రాయగలరు అనుకుంటే.. తెలుగు సినిమా పాట ఎప్పుడో ఆగిపోయేది.
సీతారామశాస్త్రిగారే అన్నట్లు… “కూసే కోయిల పోతే రాగం ఆగిందా??, సాగే ఏరే పాడే మరో పదం రాదా.” అని…, తరువాత ఎంత మంది రచయితలొచ్చి.. మెప్పించారు!!
ఇప్పుటికీ ఇప్పటి తరాలవారికోసం వాళ్ళు ఇంకా వ్రాయగలుగుతున్నారంటే… చాలా గొప్పే…, అదొక ప్రయోగంలాంటిదే కూడా!!
చిన్న ఉదాహరణే తీసుకుందాం… ప్రేమ అనేది కాలంతో పాటుగా మారలేకపోవచ్చేమో కానీ, మన నాన్న వయసువాళ్ళూ, మావయ్య వయసువాళ్ళూ… మన తమ్ముడి లాంటి మనసుతో ఆలోచిస్తూ…, ఈ రోజునున్న లౌ ట్రెండ్ ను స్టడీ చేస్తూ, లౌ డ్యూయెట్స్ వ్రాయటం అంత ఈజినేనంటారా???
శ్రీనివాస్ గారు అన్నట్లు.. కిక్కుంటే చాలు..
మరి నాకైతే.. పాటల్లో.. భరువైన పదాలతో కూడిన సాహిత్యం కన్నా… ఎంచుకున్న కాన్సెప్ట్, దాని వ్యక్తీకరణ ముఖ్యం…
కామేశ్వర రావు యొక్క అభిప్రాయము
Made Thursday, 3 of April , 2008 at 9:55 am
మీరు చెప్పింది కొంతవరకే నేనంగీకరిస్తాను. ఇలాటి పాటలు వీళ్ళు మాత్రమే రాయాలని అనుకోడం పొరపాటే. కానీ ఇలాటి పాటలు వీళ్ళు మాత్రం రాయకూడదు అని అనుకోడం సహజం, అందులో తప్పులేదు. ఉదాహరణకి “దాయీ దాయీ దాయి దాక్షాయనీ…” లాంటి పాటని సిరివెన్నెల రాయడాన్ని, ఊహించలేం. ఒక వేళ రాస్తే తట్టుకోడం కష్టమే. ఎందుకంటే అతని పాటలూ, ఇంటర్వ్యూ వంటివాటి ద్వారా అతని వ్యక్తిగత అభిప్రాయాలూ విన్నవారు అతన్నుంచి ఒక కనీస స్థాయిని ఆశిస్తారు. ఆ స్థాయికన్నా తక్కువ పాటలు రాస్తే ఆవేదనకో, ఆవేశానికో గురవ్వడం సహజం.
మళ్ళీ షరా: దాయీ దాయీ పాట ఇంతకీ ఎవరు రాసారో నాకు తెలీదు. ఒకవేళ ఖర్మకాలి సిరివెన్నెలే అయితే, నాలిక్కరుచుకుని, నా ఆవేదనని తీవ్రంగా ఇక్కడే బహిరంగంగా ప్రకటిస్తాను!
రానారె యొక్క అభిప్రాయము
Made Thursday, 3 of April , 2008 at 1:29 pm
పసందైన టపా. కామేశ్వర రావుగారికి “దాయీ దాయీ …” పాటే ఎందుకు గుర్తుకొచ్చిందో యేమోగానీ, ఇంటర్మీడియట్ చదివేరోజుల్లో నా మిత్రుడు ఈ పాటను గట్టిగా రాగయుక్తంగా ఇంట్లో పాడుతూవుంటే, వాళ్ల నాన్న ఆపి ఆ పాటలోని ఒకో పదాన్ని నొక్కిపలుకుతూ, వాటిని విడగొడుతున్నట్టు అరచేతిని చేతిని చంద్రబాబునాయుడిలా నిలువుగా వూపుతూ అన్నాడు - “వద్దూ… వద్దూ… వద్దు వాత్సాయనా… ఆహా… ఏమి పాటరా స్వామీ! చీరకు చాలని చింతామణి… ఓహో… ఇది గదా పాడుకోవాల్సిన పాటంటే!!” ఆయనకు ఎబ్బెట్టుగా తోచి అలా మాట్లాడినా, ఆ తరువాత మాక్కూడా ఆ పదాల అల్లికపై ఆలోచనలు వెళ్లాయి. ఇప్పటీ ఆ రోజును గుర్తు చేసుకొని నవ్వుకుంటూ వుంటాం :))
JALLIPALLIK KRISHNA RAO యొక్క అభిప్రాయము
Made Friday, 4 of April , 2008 at 7:24 am
‘రౌడి రాణి’ సినిమాలో ‘ఎస్కో కోకో కోల’ (CLUB SONG) రాసింది ఎవరో తెలుసా…. ఆరుద్ర.
శ్రీనివాస యొక్క అభిప్రాయము
Made Friday, 4 of April , 2008 at 8:23 am
కామేశ్వర రావు గారూ, మీరు చెబుతుంది “దాయీ దాయీ దాయీ దాక్షాయినీ” గురించి అయితే అది రాజసింహం సినిమాలోని పాట; రాసింది వేటూరి. అదే “దాయి దాయి దామ్మా” గురించైతే అది ఇంద్ర సినిమాలోనిది; రాసింది సిరివెన్నెల.
రాజేంద్ర యొక్క అభిప్రాయము
Made Friday, 4 of April , 2008 at 9:22 am
కృష్ణారావు గారు,అది తీస్కో కోక్కా కోలా,ఏస్కో రమ్ము సారా ఆనాటి చాలా క్లబ్బు సాంగులకూ,క్రైం సినిమాలకూ రచన చేసింది ఆరుద్రే.ఆ నాటి వారు అలాంటి పట్టింపులకు పోలేదన్నది మీ ఉద్దేశ్యం నాకు అర్ధమయ్యింది.మరివ్వాళ ఫలానా కవి(సినిమా)తన స్థాయి దిగజార్చుకోకూడదూ అని జనం సన్నాయి నొక్కులు నొక్కుతున్నారో నాకు అంతుబట్టటం లేదు.ఆరుద్రను మించిన కవి,చారిత్రక శోధకుడు,రచయిత,పరిశధకుడు,వ్యాఖ్యాత,ఇవ్వాళ సినిమా రంగం లో ఉన్నారా?
రాజేంద్ర యొక్క అభిప్రాయము
Made Friday, 4 of April , 2008 at 11:11 am
కృష్ణారావు గారు, పైగా ఆ పాట రౌడీలకు రౌడీలు సినిమా నుంచి రౌడీరాణి లోదికాదు.
కామేశ్వర రావు యొక్క అభిప్రాయము
Made Saturday, 5 of April , 2008 at 6:38 am
కవిగా మాటయెలా ఉన్నా ఆరుద్ర గొప్ప పరిశోధకుడనడంలో ఏమాత్రం సందేహం లేదు. కానీ ఇక్కడ గొప్ప కవా, పండితుడా అన్నది కాదు ప్రశ్న. సిరివెన్నెల సినిమా పాటల దిగజారుడుతనాన్నిగూర్చి చాలామార్లు బాహాటంగానే ఆవేదనని ఆవేశన్నీ వ్యక్తం చేసారు. ఇంచుమించు అన్నీ ఒక స్థాయికి దిగని పాటలనే రాసారు. తద్వారా తన గురించి తనే ఒక స్థాయిని ఏర్పరచుకున్నారు.
నాకు తెలిసి ఆరుద్ర అలాటి చింతలేవీ పెట్టుకోలేదు. రాజేంద్రగారే అన్నట్టు అతనలాటి పాటలకి పెట్టింది పేరుకూడాను. అంచేత అనితో ఎవరికీ పేచీలేదు! అలాగే సిరివెన్నెల కన్నా గొప్ప పండితుడే అయిన వేటూరితోనూ పేచీలేదు!
నవీన్ గార్ల యొక్క అభిప్రాయము
Made Thursday, 10 of April , 2008 at 1:26 pm
హ్హ హ్హ హ్హా…….నేను చెప్పిందే నిజం. జల్సా సినిమా పాటల సాహిత్యంలో ఆంగ్ల/హిందీ పదాలు విరివిగా కావాలని దర్శకుడు త్రివిక్రమ్ శాస్త్రిగారిని ముందే కోరాడంట. ఇక్కడ ఇంటర్వ్యూలో ఈ విషయం చెప్పాడు:
http://www.telugucinema.com/c/publish/featurearticles/interview_trivikramsrinivas_3.php
Sri: Jalsa doesn’t have the regular mark of Seetarama Sastry, though one can listen to his style upon repeated hearing of some songs. Still, the title song is not thought to be by Seetarama Sastry. Was it planned to be different?
Trivikram: It was done intentionally, yes! I requested him to do it, and he took six months to complete the songs in Jalsa. Once we finalized the scenes, I went to him and said that these songs need a generous sprinkling of English and Hindi words. I am glad the songs came out very well now.
నవీన్ గార్ల యొక్క అభిప్రాయము
Made Thursday, 10 of April , 2008 at 1:29 pm
ఓహ్.. ముందు టపాకు వ్రాయవలసిన వ్యాఖ్యను ఈ టపాలో వ్రాశినట్టూన్నాను 
koresh యొక్క అభిప్రాయము
Made Wednesday, 9 of July , 2008 at 10:12 pm
kooti kosam koti thippalu, cini field lo galiju thanam undakudadanu kovadam athyase kada,
పేరు: శ్రీనివాసరాజు దాట్ల వృత్తి: 'పోకిరి' సినిమాలో బ్రహ్మానందం చేస్తాడే అది :) స్వస్థలం: వైశాఖపట్టణం నివాసం: సౌభాగ్యనగరం