మాయమైన నిన్నలో నిలిచిపోని స్నేహమే
మమతలా అల్లిన ఉసురు తీయు పాశమా…

గాయమైన గుండెలో గేయమైన సవ్వడి
ప్రాణమున్న చెవులకు చేరలేదు ఎందుకో…

రాయికైన ఉండదా అణువు అంత చలనము
మగువ మనసన్నది బండరాయిని మించెనా…

నిమిషమెంత భారమో, తలపు ఏమి శూలమో
శిథిలమైన మనిషికి మరణమే శరణ్యమా…

తనకు పెళ్ళిపీటట నేను పాడెమీదట
రెండు కార్యములకీ మేళమొకటే చాలదా…

నింగి నేను చేరగా తనకు శాంతినీయగా
రాసి ఉన్నదెన్నడో ఇది రాతిబ్రహ్మ తలపులో…

RTS Perm Link

ఎద లోతుల్లో ఒక మాటుంది…
నిన్ను కలుసుకుంటున్నప్పుడు… నీ నుండి విడిపోతున్నప్పుడు…
గుండెలో చెప్పలేని బరువు…
కళ్ళలో ఉప్పునీటి చెరువు…

(మరింత పెద్ద బొమ్మ కోసం ఈ బొమ్మ మీద క్లిక్ చెయ్యండి)

RTS Perm Link

ఏదన్నా పండగొస్తే చాలు.. ఎవరు ఎలా చేసుకున్నా, ఈ ప్రవేటు బస్సువాళ్ళు నిజంగా పండుగ చేసుకుంటారు. ఆ కొన్ని రోజులూ వాళ్ళ బస్సులకు (అంటే రేట్లకు) రెక్కలొస్తాయ్. విశాఖపట్నం వెళ్లాలంటే ఓ వెయ్యి నోటు వదులుకోవాల్సిందే. ఆర్టీసీ బస్సులకు ముందే అయిపోతాయి. ఈ ప్రవేట్ వాళ్లు లేవు లేవంటూనే బ్లాకులో వెయ్యికి పైనే గుంజుతారు (అసలు రేటు 600 చిల్లర). ఆ సమయంలో ఏమీ చేయలేక కొనాల్సొస్తుంది. ఇప్పుడు పరిస్థితి మరీ దారుణం అయిపోయింది. ఆర్టీసీ వాళ్ళు కూడా తెలివిగా టిక్కెట్టులన్నీ బ్లాక్ చేసేసారు. ఇక ప్రవేటు వాళ్లు ఓ అడుగు ముందుకేసి ఏకంగా ఆన్‌లైన్‌లోనే రెట్టింపు రేట్లతో విక్రయిస్తున్నారు. ధనుంజయ, కేశినేని ట్రావెల్స్ సైట్లకెళ్లి 11 వ తారీఖున టిక్కెట్టు వెల చూడండి. 1200/1300 రూపాయలు ఉంటుంది. అయినా మొత్తం అమ్ముడైపోయాయి. ఒకొక్కసారి ఆవేశమొచ్చి ఈ సైట్లను హ్యాక్ చేసిపడెయ్యాలని ఆవేశమొస్తుంది గానీ మనకింకా అంత సీను లేదని తెలుసుకుని మిన్నకుండిపోతాను.

RTS Perm Link

తలకట్టు, వట్రువసుడి, తీయదనమూ…
ఎవరినీ మెప్పించలేకపోతున్నాయ్!
నేటి కాలపు గందరగోళాన్ని వర్ణించలేక పోతున్నాయ్!
అందుకేనేమో సాలార్జంగు మ్యూజియంలో  ఓ గది …
తెలుగక్షరాల్ని నింపుకోవడానికి ఆబగా ఎదురుచూస్తూంది.

నా మనవడు… చాలా ఎదిగిపోయాడు…
ఉగాది రోజు బారెడు పొద్దెక్కినా లేవలేదు…
స్నేహితుల దినాన ఓ వెయ్యినోటు చేతబట్టుకుని…
ఉదయాన్నే హుషారుగా  పోయాడు  తిరుగుళ్ళకి…

ఇక మునుముందు తరాలన్నీ అనాథలమయం…
ఎవరికీ అమ్మానాన్నలుండరు…
వాళ్ళే పిల్లలకి నూరిపోస్తున్నారు మమ్మీడాడిలంటూ…
వాళ్ళకి సవతులు వాళ్ళే!

అందమైన అమ్మాయి; చేతిలో పుస్తకాలు…
కనిపించకుండా తాళి; కాళ్ళకేమో మట్టెలు…
మధ్యాహ్నమాటకి ఐమాక్స్‌కి వచ్చింది…
పక్కనుంది మొగుడా లేక బాయ్‌ఫ్రెండా?

పక్కింటి సుబ్బారావుగారు…
దగదగా మెరిసే పట్టు వస్రాలతో వెలిగిపోతుంటారు…
కొడుకు సంపాదన ఇంట్లోకి ఒంట్లోకి  అన్నీ కొనిపెడుతుంది…
మనసులో వెలితిని మాత్రం నింపలేకపొతుంది…
వాడెప్పుడొస్తాడో మరి అమెరికా నుండి!

ఆ రోజుల్లో అయితే… చిన్నపిల్లల్లా బయట అందరమూ చేరి…
దీపావళి రోజున పటాసులు గట్రా కాలుస్తూ తెగ ఆనందపడిపోయేవాళ్ళాం…
ఇప్పూడేమో రోజూ బయట ఎవడేం పేలుస్తాడో అని ఇంట్లోనే మగ్గిపోతున్నాం.

RTS Perm Link